Қирғизистон президенти Сўўрўнбай Жээнбековнинг Германияга расмий сафари доирасида икки давлат бизнесменлари ўртасида 1 миллиард евродан кўпроқ шартномалар имзоланди.
Бу ҳақда Сўўрўнбай Жээнбеков 16 апрель куни Берлинда ўтган матбуот анжуманида маълум қилди.
Жээнбековнинг Германия сафари 2 кун давом этди. У Германия президенти Франк-Вальтер Штайнмайер ҳамда канцлер Ангела Меркель билан музокаралар ўтказди.
Меркель Қирғизистон ва Германия тадбиркорлари ўртасида Мюнхенда ўтган бизнес форумда эришилган келишувларни қўллаб-қувватлади.
«Бу форум қирғиз ва немис бизнесменлари ўртасидаги янада кучлироқ ҳамкорликнинг бошланиш нуқтаси бўлади, деб умид қиламан», деди канцлер.