АҚШ давлат котиби Майк Помпео Афғонистон президенти Ашраф Ғанига қўнғироқ қилиб, толиблар билан белгиланган музокаралар бошқа муддатга қолдирилгани юзасидан афсус изҳор қилди ва жангари гуруҳ ўзининг “баҳор ҳужумларини” бошлаганини қоралади.
250 ка яқин Афғонистон сиёсатчиси ҳамда фуқаровий жамияти аъзоси 19 апрель куни Қатар пойтахти Доҳада толиблар вакиллари билан учрашиши керак эди. Бу Кобулдаги ҳукумат ҳамда толиблар ўртасидаги илк учрашув бўлган бўлар эди.
Аммо Афғонистон делегацияси таркиби бўйича юзага келган келишмовчилик туфайли 18 апрель куни музокаралар кутилмаганда бекор қилинди.
АҚШ Давлат департаменти эълон қилган баённомада ёзилишича, Помпео президент Ғанига 21 апрель куни телефон чалиб, толиблар “баҳор ҳужумлари”ни бошлаганини кескин қоралаган. Котиб, шунингдек, музокаралар Афғонистонда тинчлик ўрнатишга олиб келувчи энг мақбул йўл эканлигини айтиб, ҳар икки тарафни музокараларда ким иштирок этиши бўйича келишувга эришишга чорлаган.