Саудия Арабистонида 23 апрель куни суд томонидан террорчиликда айбдор деб топилган 37 одам бир вақтнинг ўзида қатл этилди.
CNN каналининг Саудия Ички ишлар вазирлигига таяниб хабар беришича, қатл қилинганларнинг асосий қисми, яъни 33 нафари шиадир.
Human Rights Watch халқаро ташкилотининг билдиришча, қатл қилинган шиаларнинг 11 нафари 2013 йилда Эрон фойдасига жосуслик қилганликда гумонланиб қўлга олинган эди. Қолганлар эса 2012 йилда Саудия ҳукуматига қарши уюштирилган тартибсизликлар иштирокчиларидир.
23 апрелдаги қатлни қўшиб ҳисоблаганда, жорий йилнинг шу кунигача Саудия Арабистонида жами 146 одамга нисбатан чиқарилган ўлим жазоси ижро этилди.
Саудияда сўнгги марта ўлимга ҳукм қилинганларни оммавий равишда қатл этиш ҳолати 2016 йилда кузатилган эди. Ўшанда бир кунда 47 одам, жумладан, шиа уламоаси Нимр ал Нимр ҳам қатл қилинган. Бу воқеа асосан шиалар яшайдиган Эронда катта норозиликларга сабаб бўлган эди.