Ҳавога кўтарилганидан ярим соат ўтиб орқага қайтган “Сухой Супержет 100” учқичи ҳалокати сабаблари тафтиш қилинаëтган бир пайтда¸ Россия Транспорт вазирлиги бу русумдаги бошқа учқичларни рейсдан чиқаришга сабаб йўқлигини билдирди.
Фавқулодда тарзда Шереметьево аэропортига қўндирилган “Сухой Супержет 100”даги ëнғин оқибатида унинг бортида бўлган 78 одамдан 41 нафари нобуд бўлди¸ яна олти йўловчининг аҳволи оғир экани айтилмоқда.
Москва-Мурманск рейсида учаëтган “Сухой Супержет 100” Аэрофлотга қарашли бўлган.
Россия матбуотининг билдиришича¸ учқич ҳалокатини тафтиш қилаëтган комиссия¸ унга учувчилар йўл қўйган кетма-кет хатолик саббаб бўлган¸ деган версияни ўрганмоқда.
АҚШнинг Boeing ширкати ишлаб чиқараëтган 737 Max русумидаги иккита учқич қулаши ортидан жорий йил март ойида дунë ҳукуматлари бу русумдаги учқичларнинг учишини тақиқлади.
2018 йилнинг 29 октябрида Индонезия¸ 2019 йилнинг 10 мартида Эфиопияга қарашли Boeing 737 Max йўловчи учқичи техник носозлик сабаб қулаши оқибатида 300 дан ошиқ одам нобуд бўлди.