Даниэль Розенблюм 9 май куни АҚШнинг Ўзбекистондаги элчиси сифатида қасамёдга келтирилди. Бу ҳақда «Америка овози» радиоси хабар берди.
АҚШ Сенатининг Халқаро алоқалар бўйича қўмитаси 2018 йилнинг сентябрида Розенблюмни Ўзбекистондаги элчи лавозимига номзод сифатида тасдиқлаган эди.
Ноябрь ойида қўмита таркиби янгиланиши муносабати билан, унинг номзодини элчи сифатида тасдиқлаш бошқа муддатга қолдирилганди. Қўмита таркиби янгидан сайланганидан сўнг жорий йилнинг 11 апрелида Розенблюм элчи сифатида тасдиқланган.
Розенблюм Вашингтонда ўтган қасамёд маросимида сўзлаган нутқида Ўзбекистондаги элчи сифатида Афғонистонда тинчлик ўрнатилишига эришиш, Ўзбекистондаги ислоҳотларни ҳар томонлама қўллаб-қувватлаш, АҚШ инвестициялари учун қулай муҳитни яратиш, инсон ҳуқуқлари ҳимояси соҳасида фаолият юртиш каби вазифаларни бажаришни мақсад қилиб олганини айтди.
Розенблюм май ойи ичида Ўзбекистонга келади ва президент Шавкат Мирзиёевга ишонч ёрлиғини топширгач, элчи сифатида иш бошлайди. Аввалги элчи Памелла Спратленнинг ваколатлари 2018 йилнинг июнида якунланган эди.