Қозоғистонда бўлиб ўтаётган муддатидан аввалги президент сайловини кузатишни хоҳлаган Чехия, Россия ва қирғизистонлик етти нафар журналистга аккредитация берилмади.
Ташқи ишлар вазирлиги матбуот котиби Айбек Смадияров Озодлик радиоси журналистларига рухсат берилмаганини маълум қилди, аммо бунинг сабабини очиқламади.
Смадияров аккредитация ололмаган журналистлар сайлов куни журналистик фаолиятини тўхтатиши кераклигини айтди. Озодликнинг Қозоғистондаги журналистлари эса сайлов куни фаолиятларини давом эттира олдилар.
23 апрель куни Озодлик радиоси қирғиз ва қозоқ хизмат ҳамда Current Time TV лойиҳасининг етти журналистига аккредитация сўраган эди.
Вазирлик, шунингдек, Прага, Москва ва Киевда ишловчи яна олти нафар журналистга рухсат бермади. Улар айтиб ўтилган шаҳарлардаги қозоқ элчихоналаридаги сайловни ёритишни режалаштирган эди.