Ҳонконг полицияси 2 июнь куни норозиларни парламент биносидан қувиб чиқарди.
1 июнь куни юзлаб норозилар қонун чиқарувчи орган жойлашган бинога бостириб кирган. Уларнинг кўпчилиги арматура ва тўқмоқлар билан қуролланган эди.
Телеканалларда норозилар бино ичкарисидаги суратларни вайрон қилиб, унинг ўрнига граффитилар чизаётгани, залларга озиқ-овқат солинган қутиларни олиб келишаётгани кўрсатилди.
Ҳонконг мэри Кэрри Лам парламент биносини эгаллаб олган норозиларни "исёнчилар" деб атади. Ҳонконг парламенти депутати Тед Хуэй:
-Бу ерда хаос ҳукм сурмоқда. Вазият назоратдан чиқди. Бу ердаги вазият полиция учун ҳам, намойшчилар учун ҳам хавфлидир,-деб айтди.
1 июль куни эрталаб Ҳонконгнинг Хитойга ўтказиб берилганининг 22 йиллигига бағишланган тантана полиция ва норозиларнинг тўқнашуви билан тугаган эди.
Қонунни бузган ҳонконгликларни Хитойга экстрадиция қилишга рухсат берувчи қонун лойиҳасига қарши ўтказилаётган намойишлар 9 июнда бошланган эди. Ўшанда 1 миллионга яқин одам намойишга чиққан.
16 июнь куни эса 2 миллионга яқин одам маҳаллий ҳукумат истеъфосини талаб қилиб, намойишга чиқди.
Ҳонконг ҳукумати бошлиғи Кэрри Лам 16 июнда баҳсли қонун лойиҳасини кўриб чиқиш ўз вақтида тўхтатилмагани учун аҳолидан узр сўради. Аммо норозилар Лам истеъфосини талаб қилмоқда.
1842 йилдан бери Британия бошқарувида бўлган Ҳонконг 1997 йилда Хитой тасарруфига ўтказилган. Ўшанда Хитой Ҳонконг суд ва ҳуқуқ тизимига камида 50 йил мустақил бошқарув берилишини кафолатлаган. Бироқ сўнгги йилларда Хитой бу ваъдасини эсидан чиқармоқда ва мухторият ишларига аралашмоқда.
Ҳонконгда сўнгги марта бу каби йирик намойиш 2014 йилда бўлиб ўтганди. Ўшанда шаҳар аҳолиси Пекиннинг Ҳонконг маҳаллий ҳокимиятига ўтказилган сайловни ўз назоратига олиш уринишига қарши норозилик билдирган. 2014 йилнинг 28 сентябрида бошланган бу намойиш 79 кун давом этганди.