Исроилда 1 июлдан бери давом этаётган тартибсизликларда норозилар, полициячилар, журналистлар ва шифокорларни қўшиб ҳисоблаганда 150 одам жароҳатланди. Полиция 140 одамни қўлга олди.
Исроилнинг эфиоп жамоаси норозилигига 1 июль куни полициячи Эфиопиядан келган 19 ёшли йигитни отиб ўлдиргани сабаб бўлди. Хабарда айтилишича, полициячи муштлашаётган икки одамни ажратиб қўймоқчи бўлган, бироқ муштлашаётганлар унинг полициячи эканини билиб, тош ота бошлаганлар. Полициячи ўзини ҳимоя қилиш учун ўқ отган.
Бироқ эфиоп жамоаси полициячи 19 ёшли йигитни фақат қора танли бўлгани учунгина отиб ўлдирди, деб ҳисобламоқда.
Ўқ отган полициячи қамоққа олинган ва унга нисбатан тергов олиб борилмоқда. Шунга қарамай, Исроилнинг кўплаб шаҳарларида эфиоплар намойишга чиқиб, тартибсизликларни уюштирдилар. Улар машиналарни ёқиб юбормоқда, полициячиларни тошбўрон қилмоқда ва йўлларни тўсиб қўймоқда.
7 июль куни эфиоп жамоаси Бен Гурион халқаро аэропортида норозилик намойиш ўтказишни режалаштирмоқда.