Ҳонконгда 7 июль куни шаҳар ҳокими истеъфоси талаб қилинган навбатдаги митинг бўлиб ўтди. Ўн минглаб норозилар шаҳарнинг туристик кварталлари бўйлаб юриш қилдилар. Норозилар Ҳонконгни Хитой билан боғловчи темир йўлгача бордилар. Бироқ полиция уларни темир йўлга киргизмай, ҳаракатни тўхтатиб қўйди.
Қонунни бузган ҳонконгликларни Хитойга экстрадиция қилишга рухсат берувчи қонун лойиҳасига қарши ўтказилаётган намойишлар 9 июнда бошланган эди. Ўшанда 1 миллионга яқин одам намойишга чиққан.
16 июнь куни эса 2 миллионга яқин одам маҳаллий ҳукумат истеъфосини талаб қилиб, намойишга чиқди
1 июль куни юзлаб норозилар парламентга бостириб кирган. Полиция 2 июлда уларни бинодан қувиб чиқаришга муваффақ бўлган.
Ҳонконг ҳукумати бошлиғи Кэрри Лам 16 июнда баҳсли қонун лойиҳасини кўриб чиқиш тўхтатилганини айтиб, аҳолидан узр сўради. Аммо норозилар Лам истеъфосини талаб қилмоқда.
1842 йилдан бери Британия бошқарувида бўлган Ҳонконг 1997 йилда Хитой тасарруфига ўтказилган. Ўшанда Хитой Ҳонконг суд ва ҳуқуқ тизимига камида 50 йил мустақил бошқарув берилишини кафолатлаган. Бироқ сўнгги йилларда Хитой бу ваъдасини эсидан чиқармоқда ва мухторият ишларига аралашмоқда.
Ҳонконгда сўнгги марта бу каби йирик намойиш 2014 йилда бўлиб ўтганди. Ўшанда шаҳар аҳолиси Пекиннинг Ҳонконг маҳаллий ҳокимиятига ўтказилган сайловни ўз назоратига олиш уринишига қарши норозилик билдирган. 2014 йилнинг 28 сентябрида бошланган бу намойиш 79 кун давом этганди.