Москва шаҳар суди фирибгарликда айбланаётган франциялик банкир Филипп Дельпални 13 октябрга белгиланган навбатдаги судгача қамоқда ушлаб туриш тўғрисида қарор чиқарди.
9 июль куни бўлиб ўтган суд давомида Baring Vostok акциядорлик ширкати ҳиссадорларининг бири Дельпаль Россияда 15 йилдан бери яшаётганини, ҳеч қаерга қочиб кетмаслигини айтди.
- Менинг ҳаётим Россияда. Чиқиб кетишим эҳтимоли йўқ, чунки бундай қилиш мени айбдор қилиб кўрсатган бўларди. Аслида эса айбдор эмасман, - деди у.
Baring Vostok асосчиси америкалик Майкл Калви, Дельпаль ҳамда ширкатнинг бошқа ходимлари февраль ойида Моксвада қўлга олинган эди. Уларга молиявий жиноятларга қўл уриш айблови қўйилган.
Калви ва бошқа гумонланувчилар уларга қўйилган айбловларни рад этиб келади.
Апрель ойида Калви уй қамоғига чиқарилди. 8 июль куни суд уни октябргача қамоқда ушлаб туриш тўғрисида қарор чиқарган.
Россияда хорижлик сармоячиларнинг қўлга олингани ғарб сармоячиларини лол қолдирди. Россиянинг юқори лавозимли тадбиркорлари ҳамда бир қатор расмийлари мамлакатда хорижлик тадбиркорларга ўтказилаётган босимни қоралади.