Франция экология вазири Франсуа Де Рюжи солиқ тўловчиларнинг пулларини суиистеъмолида айбланганидан бир ҳафта ўтиб, истеъфога кетди.
Иддаоларга кўра, вазир меҳмонлар учун ташкил этилган оқшомги зиёфатларга катта миқдорда пул сарфлаган.
Де Рюжининг ўзи буни “фуқаролик жамияти вакиллари билан учрашув” эканлигини айтиб, бу каби тадбирларни уюштириш ҳуқуқига эга эканлигини айтган. Истеъфо аризасини топширган экология вазири "медиа линчи" қурбонига айланганини таъкидлаган.
Mediapart нашри эътибор қаратган сарф-ҳаражатлар Де Рюжи Франция Миллий Йиғини раиси бўлиб ишлаган даврга тааллуқлидир. Банкетларнинг катта қисми Парижда бўлиб ўтган, уларни сиёсатчининг рафиқаси, Gala гламур-нашри журналисти уюштиргани айтилган.
Зиёфатларда тарқатилган айрим винолар бир шишасининг нархи, ОАВ маълумотларига кўра, 500 еврогача етган. Бундан ташқари, меҳмонлар қимматбаҳо омарлар билан сийланган. Бу эса экология фаолларининг норозиликларига сабаб бўлган. Уларга кўра, ноёб денгиз жониворини истеъмол қиладиган инсон экология вазири лавозимини эгаллаши мумкин эмас.
Франсуа де Рюжи бу маълумотлар туҳмат эканини айтиб, Mediapart нашрини судга беришини маълум қилди.
Нашр эса эълон қилинган маълумотлар ижтимоий аҳамиятга эгалиги, сиёсатчиларнинг фаолияти, даромадлари ва можаролари жамият томонидан назорат қилиб турилиши кераклигини урғуламоқда.