Қирғизистоннинг Иссиқкўлида бедарак йўқолган қозоғистонлик сайёҳ 16 июль куни ўзи дам олаётган пансионатга қайтган. Бу ҳақда Иссиқкўл вилоят Ички ишлар бошқармаси маълумот тарқатди.
Аввалроқ 53 ёшли қозоғистонлик 14 июль куни пляжда ижарага олган скутерда кетганича қайтиб келмагани хабар қилинганди. У милиция ва ўнлаб қутқарувчилар томонидан қидирилаётганди.
ИИБ маълумотига кўра, сайёҳ ортга қайтганидан кейин кўлнинг жанубий соҳилига етиб борганида скутер чўкиб кетгани ва пансионатга таксида қайтишга мажбур бўлганини айтган.
“Вазиятни тўла ўрганиш учун Қозоғистон ватандоши Иссиқкўл туман милиция бўлимига таклиф қилинган”, дейилади ИИБ хабарномасида.