Россия президенти Владимир Путин Украинанинг Донецк ва Луганск вилоятлари аҳолисига Россия гражданлигини беришнинг осонлаштирилган тартибини жорий этиш тўғрисидаги фармонни имзолади.
Жорий йилнинг 21 апрелида Путин Донецк ва Луганск вилоятларининг фақат "муайян ҳудудларида", яъни россияпараст айирмачилар бошқарувида бўлган қисмларида истиқомат қилувчиларга Россия гражданлигини беришнинг осонлаштирилган тартибини жорий этиш тўғрисидаги фармонни имзолаган эди.
Путиннинг бу қарорини Киев ва ғарб давлатлари Украина суверенитетини емиришни кўзловчи чора ўлароқ кескин қоралади.
Украина ушбу қарор асосида чиқарилган Россия паспортларини ноқонуний деб эълон қилган.
Янги фармон 2014 йилда, яъни Украина шарқида уруш бошланган пайтда Донецк ва Луганск вилоятлари аҳолиси бўлганларга соддалаштирилган тартибда Россия фуқаролигини олишига йўл очиб беради.