Қозоғистоннинг Чимкент шаҳрида 25 август куни йигирма нафарга яқин одам беш йилга озодликдан маҳрум этилган фаол Макс Бокаевни ва бошқа фаолларни озод қилиш талаби билан пикет ўтказди.
Макс Бокаев Атирау шаҳрида 2016 йилда ўтказилган норозилик митинглари ортидан қамоққа олинган эди. У ҳуқуқ ташкилотлари томонидан сиёсий тутқун сифатида тан олинган.
Пикетчилар қўлларида “Макс Бокаев. Сўз эркинлигини чеклаш йўқ!”, Кайирли Ўмарга озодлик!”, “Серик Жакинга озодлик!”, “Сиёсий ҳибсга олишларни тўхтатинг!”, “Мухтар Жакишевга озодлик! Барча сиёсий тутқунларга озодлик!” каби плакатларни кўтариб турдилар.
Шаҳар расмийлари пикетчиларни “ноқонуний тадбир ўтказаётганлари” тўғрисида огоҳлантирганидан сўнг бир ярим соат ўтгач, фаоллар тарқаб кетдилар. Улардан ҳеч бири қўлга олинган эмас.
Қозоғистон пойтахти Нур-Султон шаҳрида ҳам 12 август куни қатор Европа давлатларнинг элчихоналари жойлашган кўп қаватли бино олдида йигирмага яқин фаол сиёсий маҳбусларни озод этиш талаби билан норозилик намойиши ўтказган эди.
Норозилар Қозоғистон атом саноати агентлигининг собиқ раҳбари Мухтор Жакишевни, диссидент шоир Арон Атабекни, фуқаролик ҳуқуқлари ҳаракати фаоллари Макс Бокаевни, Алмат Жумагуловни ва Кенжабек Абишевни озод этилишини талаб қилганлар.