Россия махфий хизматининг собиқ ходими Сергей Скрипаль ва унинг қизи Юлиянинг Буюк Британияда заҳарланиши муносабати билан қўлланилаётган бу жазо чоралари 26 августдан кучга кирди.
АҚШнинг янги санкциялари, хусусан, Россиянинг давлат қарзи билан боғлиқ молиявий амалиётларга чеклов киритилиши билан боғлиқ. АҚШ халқаро молиявий ташкилотлардан Россияга кредит бермасликни талаб қилади. Америка банклари Россия суверен қарзининг бирламчи савдосида иштирок эта олмайди ва Россия ҳукуматига кредит беролмайди.
Скрипаллар билан боғлиқ санцияларнинг биринчи тўплами ўтган йилнинг августида жорий қилинган эди. Санкциялар 2018 йил, 22 августдан кучга кирган. Жумладан, Россияга миллий хавфсизлик мақсадларида ишлатиладиган товарларни сотиш тақиқланган эди.
Британиянинг Солсбери шаҳрида Россия разведкасининг собиқ ходими Сергей Скрипаль ва қизи Юлия 2018 йил, 4 март куни ҳушсиз ҳолда топилган эди. Кейинроқ улар Совет даврида ишлаб чиқилган асабни фалажловчи "Новичок" газидан заҳарлангани хабар қилинган эди.
Бирлашган Қироллик махсус хизматларининг маълумотларига қараганда, заҳар Россия ҳудудида ишлаб чиқарилган. Москва бу иддаони рад этиб келади.