Бишкек шаҳар, Биринчи май туман суди “Ата Мекен” партияси раҳбари, Жўғўрқу Кенеш собиқ спикери, бир неча чақириқдаги парламент депутати Ўмурбек Текебаев ҳамда экс-элчи Дуйшенқул Чўтўновнинг эҳтиёт чорасини ўзгартириш тўғрисида қарор қабул қилди. Сиёсатчилар уй қамоғига чиқарилди.
Ўмурбек Текебаев 2017 йил февралида 2010 йилда Россия фуқароси Леонид Маевскийга “Мегаком” компанияси акцияларини харид қилишда ёрдам кўрсатганликда ва бунинг учун 1 млн доллар олганликда гумон қилиниб ҳибсга олинган эди. Унга нисбатан Жиноят кодексининг «Коррупция» моддаси бўйича айб қўйилган ва жиноят иши қўзғатилган эди.
ҚР Олий суди 2017 йил, 21 ноябрда сиёсатчига ва у билан бирга судланган ҚРнинг Жанубий Кореядаги собиқ элчиси Дуйшенқул Чўтўновга нисбатан туман ва шаҳар судлари чиқарган ҳукмни ўз кучида қолдирди. Улар мол-мулки мусодара қилинган ҳолда 8 йил муддатга қаттиқ режимли колонияга ҳукм қилиндилар. Бироқ ҳукм қилинганлар ўзларига қўйилган айбловларни инкор қилишади, жиноий иш сиёсийлаштирилганлигини айтиб келишади.
ҚР Олий суди 2019 йил, 21 август кунги қарори билан бу икки сиёсатчи устидан чиқарилган барча суд ҳукмларини бекор қилди. Улар устидан очилган жиноят иши дастлабки инстанция судида қайта қараладиган бўлди.