АҚШнинг ўн нафар собиқ элчиси Вашингтонни Қўшма Штатлар Толибон билан Кобул ўртасида «ҳақиқий тинчлик битими»га эришилгунига қадар қўшинларини олиб чиқиб кетадиган бўлса, Афғонистон «мураккаб фуқаролар уруши» чангалида тарқалиб кетиши мумкинлигидан огоҳлантирди.
«Ҳарбийларни кенг миқёсда олиб чиқиб кетиш якуний тинчлик битимига эришилгачгина амалга оширилиши лозим», дейилади собиқ дипломатлар 3 сентябрь куни Атлантика таҳлил маркази билан ҳамкорликда тарқатган баёнотда.
Мазкур баёнот АҚШнинг Афғонистон бўйича махсус вакили Залмай Ҳалилзод Қатарда Толибон билан деярли бир йил мобайнида ўтказилган музокаралар ортидан «принципда тинчлик шартномасига эришиш» ҳақида келишиб олганларини эълон қилганидан бир кун ўтиб янгради.
Толибон билан тинчлик шартномасига эришилаётгани тўғрисидаги билдирувларга қарамай, Афғонистонда террор ҳаракатлари тўхтамаяпти. Масалан, 2 сентябрь куни Кобулда Толибон томонидан уюштирилган ҳужум оқибатида тинч аҳолидан камида 16 киши ҳалок бўлди, 110 одам яраланди.