Африкалик қароқчилар Камерун қирғоқларида “Мармалайта” кемасидан ўғирлаб кетган россиялик денгизчилар озод этилди. Новости агентлигининг 22 сентябрда билдиришича, улар ҳозир Германияга олиб келинган.
Хабарда айтилишича, денгизчиларнинг саломатлиги яхши. Улар сентябрь ойининг охирларида Россияга жўнатиладилар.
"Мармалайта" юк ташувчи кемасига 15 август куни Камеруннинг Дуала порти яқинида ҳужум қилинган эди. Мазкур кема Германия ширкатига қарашли. У Антигуа ва Барбуди байроғи остида сузган.
Қароқчилар томонидан гаровга олинган 8 денгизчидан уч нафари Россия, тўрт нафари Филиппин ва бир нафари Украина фуқаросидир.
Хабарда Филиппин ва Украина денгизчисининг тақдири ҳақида маълумот берилмаган.