Россия мудофаа вазири Сергей Шойгу коррупцияни фош қилувчи суриштирув журналистлари фаолиятини Сталиннинг “Катта террори” давридаги чақув ва зимдан хабар беришларга қиёслади.
- Бу ҳаммаси 1937 йилдаги оммавий чақимчилик кампаниясини эслатади, - деди вазир “Москвоский комсомолец” газетасига берган интервьюсида.
Шойгунинг фаолияти бўйича Россияда иккита журналистик суриштирув ўтказилган.
Сталин сиёсий рақибларини йўқ қилиш учун 1937 йилнинг 30 июлида “Катта террор” кампаниясини бошлаган. Ушбу даҳшатли кампания доирасида тақрибан 700 минг Коммунистик партия аъзоси ҳамда ҳукумат расмийcи сохта суд қилиниб, ўлимга ҳукм қилинган.
- Ўша пайтда одамлар нега чақимчилик қилган? Айримлар кимнинг устидан нолиган бўлса, ўшанинг ўрнини эгаллашни хоҳлаган. Айримларнинг бошқа мақсади бўлган. Бугун худди шундай бўляпти: ички ва ташқи буюртмачилар кўрсатмаси билан фаолият юритаётган оммавий чақимчиларга гувоҳ бўлиб турибмиз, - деди Шойгу.
2015 йилда Алексей Навальний асос солган Коррупцияга қарши кураш жамғармаси Шойгу бўйича суриштирув ўтказиб, Подмосковьеда вазирнинг 18 миллион доллар қийматга эга данғиллама уйи борлиги аниқланганини хабар қилган эди.