“Чегара билмас мухбирлар” халқаро ташкилоти Россияда журналист Светлана Прокопьева жиноий қонунчилик асосида таъқиб қилинаётганини қоралади.
Светлана Прокопьева “террорчиликни оқлаш”да айбланмоқда. “Чегара билмас мухбирлар” журналист фақат ўз касбий вазифасини бажарганини таъкидлаб, бунинг учун жиноий жавобгарликка тортиш ноқонуний деб ҳисоблайди.
“Чегара билмас мухбирлар” баёнотида айтилишича, “Бу билан Россия ҳукумати рус журналистлари ҳамжамиятида қўрқув муҳитини пайдо қилишга интилмоқда”.
Аввалроқ Озод Европа-Озодлик радиоси ҳам Светлана Прокопьевага нисбатан жиноят иши очилганини қоралаган эди. Ширкат президенти Жейми Флей “журналистни шахсий фикр билдиргани учун таъқиб қилиш йўл қўйиб бўлмайдиган ҳолатдир” деб айтди.
Прокопьева мазкур айблов билан етти йилгача қамалиши мумкин. У терговда ўз айбини тан олган эмас.
Светлана Прокопьева 2018 йилнинг ноябрида Архангельск ФСБси олдида қўлбола бомбани портлатиб ҳалок бўлган 17 ёшли йигитнинг ҳаракатларига муносабат билдирар экан, бу воқеа сиёсий режимнинг репрессияларига жавобан уюштирилган бўлиши эҳтимол, қабилида фикр билдирганди.
Шундан сўнг 2019 йилнинг февралида унга нисбатан жиноят иши очилган.