Афғонистон мустақил сайлов комиссияси аъзоси 28 сентябрдаги президентлик сайловида, норасмий маълумотлар бўйича, 2 миллиондан кўпроқ одам иштирок этганини билдирди.
Бу рақам аввалги президентлик сайловида иштирок этганлар кўрсаткичидан бир неча баробарга оздир. 2014 йилдаги президентлик сайловида 7 миллион одам овоз берган эди.
Жорий сайловда аёллар иштироки ҳам жуда кам бўлгани айтилмоқда. Сайловда камида 9 миллион сайловчи иштирок этиши умид қилинаётган эди.
29 сентябрь тонгида сайлов комиссияси 1 миллион 100 минг овоз санаб бўлинганини айтди. Сайлов куни Толибон жангарилари қатор ҳужумларни амалга оширди.
-Бугунги жангларда икки нафар полициячи ҳалок бўлди. Бир полициячи, икки нафар ҳарбий ва 37 нафар маҳаллий аҳоли яраланди,-деб билдирди Ички ишлар вазири Маъсуд Андараби.
Сайлов куни Афғонистондаги 4905та сайлов участкасидан 500таси жангарилар ҳужуми таҳдиди мавжудлиги сабабли ёпиб қўйилди.