Франция президенти Эммануэль Макрон сешанба куни Страсбургда украиналик таниқли кинорежиссëр Олег Сенцов билан учрашди.
Беш йил Россия қамоғида сақланган Сенцов Россия ва Украина ўртасидаги маҳбуслар айирбошлаш доирасида яқинда озодликка чиқарилган эди.
Украинадаги "Перший" телеканали француз президентининг Сенцов билан учрашувидан айрим лавҳаларни намойиш этди. Макроннинг ижодий режаларига оид саволига Сенцов¸ кинога қайтиш ва китоб ëзиш ниятида эканини билдирди.
Сенцов шунингдек Франция раҳбарига ўз тақдирига нисбатан кўрсатган эътибори учун миннатдорчилик билдирди¸ Россия қамоғида қолаëтган бошқа украиналикларни ҳам унутмасликни сўради.
Франция жамоатчилиги ва ҳукумати Россиядаги украин тутқунлари озод этилиши талаби билан ўтган йил декабрь ойида очлик ўтказган Сенцовнинг озодликка чиқарилишида фаол роль ўйнади.
Украиналик кинорежиссëрга Парижнинг фахрли граждани мақоми берилди¸ Европа парламенти эса унга Сахаров мукофотини берди.
Сенцов билан учрашувдан сўнг Европа Кенгаши Парламент ассамблеяси очилишида нутқ сўзлаган Макрон Сенцовни “бошқаларнинг эркинлиги ҳам ўз шахсий эркинлиги каби муҳимлигига ишонган буюк европалик” деб таърифлади.
Асли қримлик Олег Сенцов ярим оролнинг Россия томонидан аннексия қилинишига қарши чиқиши ортидан Москва уни террорчиликда айблаб¸ 20 йил қамоққа ҳукм қилган эди.