АҚШнинг Россиядаги элчиси Жон Хантсман Кремлни жосусликда айбланиб қамоқда сақланаётган америкалик Пол Уиланни зудликда озод этишга чақирди.
-Мен Россия ҳукуматини зудликда Полни озод этишга чақираман. Унинг соғлиғи ёмонлашган ва унга қарши бирорта далил-исбот йўқ. Агар бирорта далил-исбот бўлганида эди, Россия ҳукумати бу ҳақда маълум қилган бўларди. Аммо биз ҳам, унинг адвокати ҳам бундай-далил-исботлар борлигини билмаймиз,- деди Жон Хантсман 2 октябрь куни журналистларга берган интервьюсида.
Россия Федерал хавфсизлик хизмати 2018 йилнинг 31 декабрь куни АҚШ фуқароси Пол Уилан жосуслик қилаётган пайтида қўлга тушганини маълум қилган эди. Уиланнинг қариндошлари эса у Москвага тўйга борганини айтмоқдалар.
48 ёшли Пол Уилан Мичиган штатида яшаган ва АҚШдаги автомобиль эҳтиёт қисмларини сотувчи "BorgWarner" ширкатининг хавфсизлик бўйича директори лавозимида ишлаган.
АҚШ ҳукумати Россиядан Пол Уиланни озод этишни талаб қилиб келмоқда.