АҚШ президенти Дональд Трамп 23 октябрь куни Анқарага нисбатан жорий қилинган санкциялар бекор қилинганини билдирди. Мазкур санкциялар бир неча кун муқаддам Туркия АҚШнинг Сурия шимолидаги иттифоқчилари бўлган курд қуролли отрядларига қарши ҳарбий амалиёт бошлагани ортидан киритилганди.
Трампга кўра, санкциялар Туркия амалиёти тўхтатилгани сабабли бекор қилинган. Мабодо ҳудудда АҚШга “маъқул келмайдиган бирор-бир ҳодиса рўй бергудек бўлса”, жазо чоралари тикланиши мумкин.
Президент Трамп ўт очишни тўхтатишга айнан Қўшма Штатларнинг тиришқоқлиги кўмаклашганини урғулади.
Шу билан бирга, Трамп ўзининг Сурия шимолидан АҚШ қўшинларини олиб чиқиб кетиш қарори тўғри бўлганини яна бир бор таъкидлади. АҚШ президентига кўра, тез-тез қон тўкиладиган бу ҳудуд учун масъулиятни эндиликда бошқа мамлакатлар олиши мумкин.
Трамп Туркия билан Россия ўртасида яқинда эришилган келишувни бевосита тилга олгани йўқ. Мазкур келишувга мувофиқ, Туркия билан Сурия чегарасидаги ҳудуднинг бир қисми феълан Анқара назоратига берилади, бошқа қисмини эса Россия ҳарбийлари ва унинг иттифоқчиси бўлган президент Асадга содиқ кучлар назорат қилади.
АҚШ президенти чоршанба куни америкалик ҳарбийларнинг кичик бир қисми нефть конларини қўриқлаш учун Сурия шарқида қолиши ҳақида баёнот берди.