24 октябрь куни НАТОга аъзо давлатларнинг мудофаа вазирлари Брюссель шаҳрида икки кунлик йиғин учун тўпланади.
АҚШ мудофаа вазири Марк Эспер йиғин давомида муҳокама қилинадиган асосий масала Туркия Сурия шимолида бошлаган амалиёт бўлишини айтди.
НАТО аъзоси бўлмиш Туркиянинг Суриядаги ҳаракатлари кескин танқидга учради. Хусусан, Анқаранинг бу амалиёти минтақадаги барқарорликни издан чиқариши ҳамда “Ислом давлати” экстремистик гуруҳига қарши эришилган ютуқларга таҳдид солиши мумкинлиги айтилмоқда.
Эспернинг фикрича, Туркия НАТОга аъзо давлатларни “жуда ёмон вазиятга солиб қўйганини” ҳамда “нотўғри йўлдан кетмоқда”.
22 октябрь куни Туркия президенти Ражаб Тоййиб Эрдўғон ва Россия президенти Владимир Путин Сурия-Туркия чегарасини биргаликда назорат қилишга келишиб олди. Эртасига АҚШ Туркияга қарши жорий қилинган санкциялар бекор қилинаётганини маълум қилди.
Туркия Сурия шимолидаги ҳарбий амалиётини АҚШ президенти Дональд Трамп минтақадан Америка қўшинларни олиб чиқиб кетишга қарор қилганидан кейин бошлаган эди.