Ироқ полицияси Бағдодда норозилик акциясига чиққанларни тарқатиш учун кўздан ёш оқизувчи газ қўллади. Аксилҳукумат намойишлари уч ҳафталик танаффусдан кейин яна бошланди.
Баъзи маълумотларга қараганда, полиция осмонга ўқ узган. Ироқ Инсон ҳуқуқлари комиссияси камида 2 намойишчи ҳалок бўлганини, 100 га яқин киши яраланганини билдирди.
25 октябрда коррупция ва ишсизликдан норози бўлган халқ пойтахт Бағдод ва мамлакатнинг бошқа бир неча шаҳрида норозилик билдириб кўчаларга чиқди.
Норозиларнинг бир қисми жумага ўтар тунни Бағдоднинг марказий Таҳрир майдонида ўтказди. Ҳукумат идоралари жойлашган Яшил зонага қараб юра бошлаган намойишчиларни полиция тўхтатди.
Ироқда 1 октябрда бошланган норозилик акциялари давомида,расмий маълумотларга кўра, 157 киши ҳалок бўлган.