Human Rights Watch (HRW) ташкилоти АҚШ Марказий разведка бошқармаси (МРБ) қўллаб келган Афғонистондаги ҳарбийлаштирилган кучлар қотиллик ва бошқа жиддий жиноятларга қўлга урганини иддао қилди. Гуруҳ 31 октябрь куни эълон қилган ҳисоботда “анъанавий ҳарбийлар назоратида бўлмаган” гуруҳлар одамларни судсиз қатл қилгани, ўғирлаб кетгани ҳамда соғлиқни сақлаш иншоотларига ҳужум қилгани айтилган.
HRW Афғонистон ҳукуматини бу гуруҳларни тарқатиб юборишга ҳамда уруш жиноятлари ва бошқа жиддий жиноятлар учун масъул бўлган шахсларни жавобгарликка тортишга чақирди.
Ташкилот Афғонистон ва АҚШ ҳукуматларини мустақил терговчилар билан ҳамкорликда уруш жиноятлари ва бошқа қонунбузарликлар ҳақидаги иддаоларни кўриб чиқишга чақирди. Шунингдек, HRW АҚШни қонунбузарликларга алоқадор ҳарбийларини жазолашга ва хунрезликларга қўл урган афғон кучларини дастаклашни тўхтатишга чорлади.
HRW ташкилоти 2017 йил якунидан 2019 йил ўртасигача МРБ қўллаган гуруҳлар рейдлар давомида жиддий қонунбузарликларга қўл урганини кўрсатувчи далилларни тўплаган.
МРБ ҳисоботда келтирилган иддаолар "ёлғон ёки бўрттирилган" эканлигини айтиб, уларни рад этди.
