АҚШ давлат котиби ўринбосари Жон Салливан Россия билан алоқалар яхшиланиши учун Москва демократик жараёнларга қарши курашишни бас қилиши ҳамда Украинада тинчлик ўрнатилишига ҳисса қўшиши зарурлигини таъкидлади.
Салливан АҚШнинг Россиядаги элчиси лавозимига номзод этиб кўрсатилган ва у Россия ташқи ишлар вазири Сергей Лавров билан учрашувда бу шартларни тилга олди.
АҚШ Давлат департаменти матбуот котиби Морган Ортагус Салливан Россия ташқи ишлар вазири билан Японияда бўлиб ўтган “Катта йигирматалик” йиғинида учрашганини билдирди.
Ортагус эълон қилган баёнотга кўра, Салливан ва Лавров кўплаб масала, жумладан, Шимолий Корея ва Суриядаги вазиятни ҳамда терроризмга қарши кураш ва стратегик хавфсизлик масалаларини муҳокама қилган.
Салливан ўзаро муносабатлар яхшиланиши Москванинг “Минск келишувларига амал қилиши ҳамда демократик жараёнларга путур етказишдан воз кечишига” боғлиқ бўлишини айтган.
Россия 2014 йилдан бери Украина шарқида Киев кучларига қарши курашаётган россияпараст айирмачиларни қўллаб келади. Тўқнашувларда бугунга қадар 13 мингдан ошиқ одам ҳалок бўлди.
Франция ва Германия қўллови билан имзоланган “Минск келишувлари“ деб номланувчи тинчлик музокаралари шарқий Украинадаги тўқнашувлар бутунлай тўхташига олиб келгани йўқ.