Тбилисидаги грузин парламенти биносини қуршаб олган акция иштирокчилари огоҳлантирилганидан сўнг сешанба куни эрталаб ИИВнинг махсус бўлинмаларининг маълум қисми намойишчиларни тарқатишга киришди.
Кўпминг кишилик норозилик митинги иштирокчилари мухолифат етакчиларининг чақириқларига биноан бинони эгаллаб олишга уринди. Улар шу тариқа миллиардер Бидзина Иванишвилининг хукмрон “Грузия орзуси” партиясининг ялпи мажлисига қаршилик кўрсатмоқчи бўлди. Бу ҳақда Тбилисидаги Озодлик радиоси мухбири хабар берди.
Полиция парламентга кириш йўлини тозалаш мақсадида сув пуркагичлардан фойдаланди. Мухолифат баёнот бериб, норозилик акциясини давом эттираверишини, хукумат эса мажлисга йиғилмоқчи бўлган парламент бемалол ишлаши учун ҳар гал куч ишлатишга мажбур бўлишини маълум қилди.
Митингни тарқатиш вақтида полиция мухолифатдаги партиянинг бир нечта етакчисини, жумладан собиқ президент Михаил Саакашвили тарафдорларини ушлади. Кейинроқ уларнинг ҳаммаси озод қилинди.
Грузин мухолифати сайлов қонунчилиги масаласида ислоҳатлар ўтказилишини ва пропорциональ сайлов тизимига ўтишни талаб қилмоқда.
14 ноябрь куни парламентдаги кўпчилик партия рўйхати бўйича сайловларга ўтишга қарши чиқди. Бунга жавобан мухолифат норозилик акциясига чиқишини билдирди. 18 ноябрь куни Грузия парламенти ишни қайта тиклай олмади: норозилик иштирокчилари бинога кириш йўлларини эгаллаб олди. Грузия полицияси намойишчиларни сув пуркагич ва кўздан ёш оқизувчи газ ишлатган ҳолда тарқатишга уринди.
Кеча хукмрон “Грузия орзуси” партиясининг бош котиби, Тбилиси мэри Каха Каладзе баёнот бериб, 2020 йилда Грузия парламентига сайловлар амалдаги сайлов тизими бўйича ўтишини билдирди.