Польша Ташқи ишлар вазирлиги Россия расмийлари Иккинчи жаҳон уруши манзарасини бузиб кўрсатаётгани ҳақида баёнот тарқатди. Бу Варшаванинг Россия президенти Владимир Путин томонидан уруш бошланишига оид сўзланган сўзларига муносабат бўлди.
Поляк дипломатларига кўра, Путинниг сўзлари икки мамлакат тарихидаги мураккаб масалалар тугунини ечишга уринаётган польшалик ва россиялик экспертлар ишига путур етказмоқда. Польша ТИВ Россия президентининг сўзларини “Сталин тоталитаризми давридаги пропагандистик хитоблар”га қиёслаган.
Россия ТИВ расмий вакиласи Мария Захарова икки томонлама алоқа ва экспертлар ишига Польша расмийларининг ўзлари путур етказаётганини билдирди. Унга кўра, Варшаванинг “сўз сўзлаш услуби агрессив” бўлиб, “совет ҳайкалларининг бузиб ташланиши бунга яққол далил бўла олади”.
19 декабрь куни Россия президенти Совет Иттифоқи Германия билан ҳужум қилмаслик ҳақида энг охири битим (Молотов–Риббентроп пакти) тузган давлат бўлганини билдирган. Путин “Чехословакиянинг бўлинишида иштирок этган”ини ҳам иддао қилган.
Россия президенти бир неча кун аввалги матбуот анжуманида тарихий воқеалар юзасидан ўз нуқтаи назарини баён этганди. У ғалабанинг 75 йиллигига бағишланган мақола ёзмоқчилиги, унда Иккинчи жаҳон уруши сабаблари ва уруш арафасидаги Европада СССРнинг сиёсатини қаламга олмоқчилигини билдирган.
Сентябрь ойида Польша Иккинчи жаҳон уруши бошланишининг 80 йиллигига бағишланган тадбирга Россия президенти Владимир Путинни таклиф қилмаганди.
Варшаванинг расмий версиясига кўра, СССР 1939 йил сентябрида худди нацистлар Германияси каби Польшага ҳужум қилган.
Жорий йилнинг 19 сентябрь куни Европарламент Иккинчи жаҳон уруши бошланишининг 80 йиллиги муносабати билан резолюция қабул қилиб, унда урушнинг бошланишига учун масъулиятни Германия билан бир қаторда Совет Иттифоқига ҳам юклаган ҳамда нацистик ва коммунистик режимларни тоталитар режимлар сифатида қоралаган.