23 декабрь куни Покистонда мухолиф “Мусулмон лига-Навоз” (PML-N) партиясининг таниқли аъзоси Аҳсон Иқбол бош вазир Имрон Хонни танқид қилганидан кейин бир неча соат ўтиб, қўлга олинди.
Маҳаллий матбуот хабарларига кўра, Покистоннинг коррупцияга қарши Миллий жавобгарлик бюроси Иқболни мамлакат шарқида спорт комплекси қурилиши лойиҳасида коррупцияга қўл уришда айбламоқда.
Иқболнинг ўзи унга қўйилган айбловни рад этмоқда. Партия матбуот котиби Марям Аврангзеб спорт комплекси лойиҳасини 2009 йилда Покистон халқ партияси бошлаганини, аммо кейинчалик лойиҳа тўхтаб қолганини айтди. Унинг сўзларига кўра, Иқбол лойиҳани қайта йўлга қўйган.
Аврангзеб Иқболнинг қўлга олиниши ортида сиёсий сабаблар борлигини айтди.
Иқбол собиқ бош вазир Навоз Шариф ҳокимиятининг ички ишлар вазири лавозимида ишлаган.
Қўлга олинишдан олдин сиёсатчи бош вазир Хонни мамлакатнинг “энг катта тиланчиси” дея таърифлаб, Покистон иқтисодини оёққа турғазиш учун берилган миллиардлаб доллар қарзга қарамасдан, муайян натижага эриша олмасликда айблаган.