Афғонистон ғарбида Толибон “Тинчлик халқ ҳаракати”нинг маршида иштирок этаётган 27 нафар аъзосини ўғирлаб кетди. Бу ҳақда 25 декабрь куни гуруҳ етакчилари ҳамда маҳаллий расмийлар билдирди.
“Тинчлик халқ ҳаракати” етакчиси Иқбол Хайбар фаоллар Фараҳ вилоятининг Болабулоқ туманида ўғирлаб кетилганини айтди.
Фараҳ вилояти кенгаши аъзоси Дадуллоҳ Қоний фаоллар олиб қочиб кетилганини тасдиқлади. Унинг сўзларига кўра, полиция фаолларни топишга уринмоқда.
Толибон ҳали ҳодисани шарҳлагани йўқ.
“Тинчлик халқ ҳаракати” ўтган йилда Афғонистондаги зўравонликка эътибор қаратиш учун мамлакат бўйлаб, хусусан, пойтахт Қобулда тинчлик маршларини ўтказган эди.