Тожикистонда тадбиркорларни қўллаб-қувватлаш мақсадида алоҳида банк ташкил этилади. Бу ҳақда Тожикистон президенти Эмомали Раҳмон 26 декабрь куни мамлакат парламентида қилган йиллик мурожаатида маълум қилди.
Давлат раҳбарига кўра, ташкил қилинадиган банк тадбиркорларни қўллаб қувватлаш мақсадида ҳар йили давлат бюджетидан маблағ олади. Банкнинг асосий мақсади маҳсулотларини экспорт қилувчи кичик ва ўрта корхоналарни қувватлашдан иборат бўлади. Президент Раҳмон ташқи савдода экспорт ҳажмининг пастлигини, шунингдек банклар ишини танқид қилди.
«Миллий банк ва бошқа акционерлик банкларининг сиёсати мамлакат иқтисодиётини ривожлантиришга йўналтирилган бўлиши керак. Улар фақатгина банк тизими билан шуғулланиш керак эмас. Давлат ичида давлат тузиш керак эмас. Миллий банк ва мамлакатдаги акционерлик банкларининг биринчи даражали вазифаси тадбиркорларни молиявий қўллаб-қувватлаш бўлиши лозим. Сизнинг олдингизда бошқа вазифа йўқ», - деди президент.
Сўнгги беш йилда Тожикистон банк тизими жиддий инқирозни бошдан кечирди. Мамлакатдаги иккита йирик банк – «Точиксодиротбанк» ва «Агроинвестбанк» ҳамон инқирозни бошдан кечирмоқда ва аҳолига омонатларни қайтара олмаяпти. Миллий банк вакиллари банк тизими инқироздан чиққанлигини айтмоқда.
Давлат раҳбари парламентга навбатдаги мурожаат билан чиқар экан хукуматнинг шу йил давомида амалга оширган ишлари ва келаси йилда давлатнинг ташқи ва ички сиёсати, ижтимоий-иқтисодий йўналишлари бўйича маълумот берди.