Ҳонконг полицияси 2020 йил кирганидан бир неча дақиқа кейин намойишчиларга қарши кўздан ёш сиздирувчи газ қўллади.
Янги йилга ўтар кечаси минглаб намойишчи республика молиявий марказида йиғилиб, инқилоб бошлаш чақириғи билан чиққанлар.
Маҳаллий матбуот хабарига кўра, Ҳонконг мавзеларидан бирида полициячилар баррикада қураётган норозиларни тарқатиш учун сув пуркагичларни ишга солганлар.
Минглаб намойишчи Янги йил киришидан сал аввал шаҳарнинг асосий кўчаларидан бирини тўсиб қўйганлар. Улар савдо марказлари бўйлаб юриш уюштириб, одамларни демократия учун курашни давом эттиришга чақириб борганлар.
1 январь куни ўн минглаб ҳонконглик яна демократия юришига чиққан. Норозилар полициянинг намойишни тарқатиш чоғидаги хатти-ҳаракатларини текшириш ҳамда қўлга олинган барчани қўйиб юборишни талаб қилганлар.
Ҳонконгда норозилик намойишлари 2019 йилнинг июнь ойидан бери давом этмоқда. Бу чиқишлар парламент жиноятчиликда гумонланганларни Хитойга экстрадиция қилиш тўғрисидаги қонунни муҳокама қила бошлагани ортидан бошланиб кетган. Кейинчалик намойишчилар Хитойдан кўпроқ мустақил бўлиш ва демократик ислоҳотлар ўтказилишини талаб қила бошлаганлар.