Қозоғистон Ички ишлар вазирлиги мамлакатда 30 кунгача бўладиган чет элликларнинг барчаси учун вақтинча рўйхатга олиш амалиётини бекор қилди. Бу ҳақда Informburo.kz сайти ИИВ матбуот хизматидан олинган маълумотга таянган ҳолда хабар қилади.
Миграция қонунчилигига оид тегишли тузатишларни Қозоғистон президенти Қасим-Жомарт Тоқаев 2019 йилнинг 28 декабрида имзолаган. Мазкур тартиб оммавий ахборот воситаларида эълон қилинганидан 10 кун ўтиб кучга киради.
Хорижлик меҳмон келгани ҳақида миграция хизматига мезбон тараф чет эллик киши мамлакат ҳудудига кирганидан бошлаб уч кун ичида хабар қилиши керак.
Агар хорижлик шахс Қозоғистонда 30 кундан кўпроқ туришни режалаётган бўлса, қабул қилувчи тараф (меҳмонхона, ижара квартиралари, даволаш-профилактика муассасалари ва бошқа юридик ва жисмоний шахслар) меҳмон учун вақтинча туриш учун рухсатнома расмийлаштириши керак бўлади.