Қўшма Штатлар Европа Иттифоқи ва Канада ортидан 29 январь куни Россияга қарши янги санкциялар жорий қилди. Санкциялар “Москванинг Украинага нисбатан давом этаётган тажовузкорлиги ҳамда Қримни оккупация қилиш ҳаракати”га жавобан киритилган, дейилади АҚШ Молия вазирлиги хабарномасида.
АҚШ Молия вазирлиги хорижий активлар устидан назорат бошқармаси (OFAC) қарорига мувофиқ, саккиз киши ва хусусий темир йўл ширкатининг Қўшма Штатлардаги активлари музлатилади. Вазирлик “Россия томонидан дастакланаётган қримлик нолегитим расмийлар” деб атаган бу шахслардан 7 нафари 28 январь куни Европа Иттифоқининг санкциялар рўйхатига киритилганди. Канада ўз “қора рўйхат”ига 6 кишини киритган.
Санкциялар “Россиянинг Қрим сиёсатига аралашуви халқаро ҳамжамият томонидан қораланишда давом этаётганини қатъий намойиш қилиш учун ўзаро мувофиқлаштирилган хатти-ҳаракатларнинг бир қисми ўлароқ” жорий қилинган.
Ҳозирги пайтда АҚШ ҳукумати қора рўйхатига 692 жисмоний ва юридик шахс ҳамда уларнинг шўъба ширкатлари киритилган.
Қора рўйхатга "Россия ва Қримнинг иқтисодий интеграциясини теранлаштириш бўйича Россия хатти-ҳаракатлари”ни қўллагани учун Grand Service Express компанияси ва унинг бош директори Александр Ганов ҳам киритилган. Ширкат Қрим кўприги орқали Россия томонидан аннексия қилинган яриморол билан қитъа ўртасида йўловчи ташиш билан шуғулланиб келади. Ширкат матбуот хизмати “Интерфакс” агентлигига Grand Service Express Россияда фаолият юритиши, шу сабабли санкциялар унинг ишига таъсир этмаслигини билдирган.