АҚШ президенти Дональд Трамп 4 февраль куни навбатдаги йиллик нутқи давомида мамлакат иқтисоди ўз етакчилиги остида эришган ютуқларга урғу берди.
Конгресс олдида сўзлаган нутқида Трамп унинг раҳбарлигида мамлакат “қайта оёққа турганини” иддао қилди.
- Иш ўринлари сони ошмоқда, маошлар кўтарилмоқда, қашшоқлик озаймоқда, жиноятчилик озаймоқда, ишонч ошмоқда, мамлакатимиз эса гуллаб-яшнаб, унга бўлган ҳурмат кучаймоқда, — деди президент ўз нутқи давомида.
Трамп сайловолди кампанияси давомида ваъда қилганидек, “Шимолий Америка эркин савдо келишуви”ни алмаштирганини айтди. Президент Мексика ва Канада билан янги савдо келишувини ўтган ҳафтада имзолаган эди. Президент янги келишув 100 минг қўшимча иш ўрнини яратишини иддао қилди.
Трамп ўз нутқи давомида АҚШ иқтисодидан ташқари соғлиқни сақлаш тизими ҳамда миграция масаласи ҳақида ҳам сўзлади. Аммо нутқи давомида президент унга қарши бошланган импичмент жараёни ҳақида ҳеч нима демади.
Президент Эрон ядровий қурол ишлаб чиқариш ниятидан воз кечса, Теҳронга қарши жорий қилинган санкцияларни бекор қилишини айтди. Шунингдек, президент Афғонистонда 18 йилдан бери тинчимаётган урушни тугатиш учун тинчлик келишуви устида ишлаётганини айтди.