АҚШ Сенати президент Дональд Трампни лавозимидан четлатишга қарши овоз бериши ортидан Оқ уй президент “уйдирма” импичмент жараёнини енгиб ўтиб, тўла оқланганини таъкидлади.
Президентнинг ўзи эса Сенат қарори бўйича кейинроқ билдирув эълон қилишини маълум қилди.
Таркибида республикачилар кўпчиликни ташкил этган Сенатда ҳокимият суиистеъмоли айблови бўйича Трамп импичментини ёқлаб 48 нафар сенатор овоз берган бўлса, 52 сенатор бунга қарши чиқди.
Конгресс фаолиятига тўсқинлик қилиш айблови бўйича эса 53 сенатор Трампни айбдор деб топишдан бош тортди, 47 сенатор эса айбловни ёқлади.
Фақат битта республикачи — ўз вақтида президентликка номзодлигини кўрсатган Митт Ромни Трампни четлатишни қўллаб овоз берди. Ромни ўз партияси аъзоси бўлган президентни лавозимдан четлатиш учун овоз берган тарихдаги илк республикачидир.
Оқ уй эълон қилган билдирувда “Бошидан айтиб келаётганимиздек, у айбдор эмас”, дейилади.
Сенатда Трамп оқлангани ҳеч кимни ҳайратлантирмади, чунки палатадаги 100 ўриннинг 53 тасини республикачилар эгаллаган.
Сенатдаги овоз бериш ортидан Трамп Twitterда 6 февраль куни “мамлакатимизнинг импичмент уйдирмаси устидан ҒАЛАБАСИ ҳақида” билдирув эълон қилиши ҳақида ёзди.