Тожикистон Телерадиоэшиттиришларни назорат қилиш давлат инспекцияси хусусий радио ва телевидение ширкатларига ҳафталик эфир режалари тўғрисида ҳар душанба куни ҳисобот беришни буюрди.
Душанбедаги бир неча хусусий ширкат ходимлари Озодлик радиосига бу ҳақда иккита мактуб олишганини билдиришди.
31 январь ҳамда 4 февралда имзоланган мактублар Телерадиоэшиттиришларни назорат қилиш давлат инспекцияси директори Тожиддин Каримзода номидан юборилган.
Инспекция Тожикистон Республикаси ҳукумати ҳузуридаги Телевидение ва радиоэшиттириш қўмитаси таркибига киради.
Мактубда хусусий телерадиоканаллар ҳар душанба куни соат 8:00 гача ўз режаларини юбормаса, уларга қарши “чора кўрилиши” таъкидланган.
Мактубда, шунингдек, хусусий ширкатлар кўпроқ “ватанпарварлик ҳамда Тожикистон мустақиллиги, анъаналари ҳамда тарихига урғу берувчи” дастурларни тайёрлашга чақирилган.
Тожикистон Мустақил матбуот бирлашмаси раиси Нуриддин Қаршибоев талаблар ноқонуний эканлигини айтиб, нашрларнинг “таҳрир сиёсатига аралашишга ҳеч кимнинг ҳаққи йўқ”, деди.