Россия президенти Владимир Путин мамлакат конституциясига бир қатор ўзгартириш ва қўшимчалар киритиш бўйича қонун лойиҳасини парламентнинг қуйи палатасига иккинчи эшитиш учун юборди.
Дума спикери ўринбосари Пётр Толстой сўзларига кўра, таклиф қилинаётган ўзгартиришлар орасида оила “эркак ва аёл” ўртасида тузилиши ҳақидаги жумлани қўшиш таклифи бор. Бу ўзгартириш қабул қилинса, Россия конституциясида бир жинсли никоҳларга қўйилган тақиқ янада мустаҳкамланади. Ўтган ҳафтада Путин ўз президентлиги давомида бир жинсли никоҳларга рухсат берилмаслигини айтган эди.
Дума спикери Вячеслав Володин таклиф қилинаётган ўзгартиришлар орасида “худога ишонч“ ибораси ҳам борлигини айтди. Шунингдек, унинг сўзларига кўра, таклиф қилинаётган ўзгартиришларнинг бири “Россия Федерацияси ҳудудини ажратиш ҳамда шундай қилишга қаратилган чақириқларни“ ман этишни кўзлайди.
Ўтган ойда Дума депутатлари конституцияни ўзгартириш таклифини биринчи эшитишда маъқуллади. Дума уни иккинчи ва учинчи эшитишда маъқуллаганидан кейин, қонун лойиҳасини парламентнинг юқори палатаси — Федерация кенгаши кўриб чиқади. Бунинг ортидан лойиҳани Путин имзолаши керак бўлади. Думада Кремлга содиқ депутатлар сони кўп бўлгани учун таклиф қилинаётган ўзгаришлар қабул қилинишини кутиш мумкин.
