Австрия сиёсий бошпана сўраган тожикистонлик Хизбулло Шовализодани Душанбега экстрадиция қилди. Маълум қилинишича, экстрадиция расмий Душанбе илтимоси билан амалга оширилган.
Ҳуқуқ фаоллари Хизбулло Шовализода Тожикистонда қийноқларга учраши мумкинлигидан ташвиш билдириб, Австрия ҳукуматини қарорни ўзгартиришга чақирган эди.
Тожикистон Бош прокуратураси 5 март куни Шовализода Душанбе аэропортига келиши биланоқ ҳибсга олингани ҳақида баёнот тарқатди. Баёнотда таъкидланишича, у Тожикистонда тақиқланган Ислом уйғониш партиясининг аъзоси ҳисобланади.
Ислом уйғониш партияси узоқ йиллар давомида Тожикистонда парламент ва ҳукуматда ўз вакилларига эга бўлган нуфузли партия ҳисобланиб келган. Бироқ 2015 йилда партия террорчи ташкилот сифатида айбланиб, фаолияти тақиқланган эди.