АҚШ ҳукумати Калифорния соҳилига келган сайёҳлик кемасида бўлган 21 одамда коронавирус аниқланганини билдирди. Кемада жами 3500 киши бор. Уларнинг барчасини диққат билан тиббий текшириш ишлари давом этмоқда.
Вице-президент Майк Пенс 6 март куни Grand Princess кемаси нотижорат портларидан бирида лангар ташлаганини айтди. Йўловчилар ва экипажни тиббий текширувдан ўтказиш учун зарур бўлган ускуналар Миллий гвардияга қарашли вертолет воситасида 5 март куни кемага ташланган.
Пенс кема йўловчиларидан олинган анализлар давлат лабораториясида текширилгани ва улардан 21 нафарида коронавирус аниқлангани ҳақида маълумот берди.
Мазкур кема 4 март куни Гавай оролларидан Сан-Францискога қайтиши керак эди. Аммо ҳукумат кемада коронавирусга чалинганлар борлиги аниқлангани оқибатида кемани ортга қайтарган.