Франция билан Эрон ўртасида собиқ маҳбуслар алмашилгач, икки маҳбус ватанига қайтди. Улардан ҳар бири бир неча ой қамоқда ўтириб чиқди.
Франциялик тадқиқотчи Ролан Маршал 21 мартда Парижга етиб борди. Унинг тарафдорлари “Ролан қайтиб келди” дея қисқача баёнот бериш билан чекланди.
Айни чоқда АҚШда қидирув эълон қилинган эронлик муҳандис Жалол Руҳуллоҳнажод Теҳронга қайтиб келди, оиласи уни ҳиссиётларга берилган ҳолда кутиб олди.
Улар иккаласи бир кун олдин озод этилган эди.
Бу ҳолни Эрон суд тизимига қарашли “Mizan Online” вебсайти “ўзаро ҳамкорлик амали” деб атади.
Икки кишининг ҳибсга олиниши Франция билан Эрон ўртасидаги муносабатларни мураккаблаштириб юборди.
Ўша пайтда Франция президенти Эммануэл Макрон Вашингтон билан Теҳрон ўртасидаги кескин муносабатларни юмшатиш йўлларини қидираётган, Эрон эса ўз иқтисодиётига АҚШнинг молиявий санкциялари етказаётган иқтисодий зарарни юмшатиш борасида Франциядан ёрдам сўраб мурожаат қилган эди.
Маршалнинг қариндоши Франс-Пресс ахборот агентлигига маълум қилишича, у тиббий кўрикдан ўтказиш учун Париж яқинидаги шифохонага олиб кетилган ва “текширув натижалари жуда яхши чиққан”.
Теҳронда давлат телевидениеси озод қилинган Руҳуллоҳнажоднинг оила аъзолари у билан қучоқлашиб кўришаётганини намойиш этди.
‒ Аллоҳга шукур, у кунлар ортда қолди, ‒ деди Руҳуллоҳнажод қамалгани вақтини назарда тутиб.
Қўшма Штатларда Руҳуллоҳнажодга нисбатан қидирув эълон қилинган, сабаби у АҚШ санкцияларини бузган ҳолда нозик саноат жиҳозларини экспорт қилишга уринишда гумон қилинмоқда. Франция ҳукумати уни айблов эълон қилиш учун АҚШга жўнатиш ўрнига озод қилиш тўғрисида қарор қабул қилди.