Чернобил ўрмонидаги ёнғин атом электр станциясининг 1986 йил апрелида ишдан чиққан 4-энергоблоки ҳудудига яқинлашди. Ёнғин ҳаракатини NASA – FIRMS онлайн ресурсида кузатиб бориш мумкин.
13 апрель куни кечқурун ёнғин ишлаб чиқариш майдончасида ўтган йили қурилган янги ҳимоя айвончасига етиб борган. Ёнғин ҳозирги пайтда радиоактив чиқиндилар омборхонасидан икки километр узоқликда давом этмоқда. Мазкур омборхонада энг юқори фаолликдаги радиациявий чиқиндилар сақланади. “Интерфакс” агентлиги бу ҳақда Украинадаги расмий манбага таянган ҳолда хабар берди.
Чернобил ҳудудида ёнғин 4 апрель куни бошланган эди. Ёнғин оқибатида ўрмоннинг бир қисми, Полосское посёлкасидаги ташлаб кетилган уйлар ва қабристон ёниб кул бўлди. Украина ҳуқуқ-тартибот тузилмалари ўрмонга махсус ўт қўйилгани ва ўт қўйган одам қўлга олинганини билдирмоқда.
1986 йилнинг 26 апрелида Чернобил АЭСида авария юз берган эди. СССР ҳукумати дастлаб авария бўлганини яширган, кейинроқ бу воқеада 31 одам ўлганини тан олган. Жаҳон Соғлиқни сақлаш ташкилоти эса авария оқибатида 9 минг одам вафот этганини билдирган. “Гринпис” халқаро ташкилоти эса камида 200 минг одам ўлган, деб ҳисоблайди.