15 апрель куни Европа Иттифоқи кенгаши раиси Шарль Мишель аъзо давлатларнинг карантин чораларини босқичма-босқич бекор қилиш стратегиясини эълон қилади.
Таклиф қилинаётган режада Европа бўйлаб жорий қилинган чекловларни бекор қилиш шартлари кўрсатилади. Аммо режани бажариш мажбурий бўлмайди: ҳар бир аъзо давлат мустақил равишда карантин чораларини бекор қилиши мумкин бўлади.
Режада аъзо давлатлар кейинги ойларда кўриши тавсия қилинаётган чоралар ҳақида батафсил маълумот берилади. Режага амал қилишни бошлаш учун икки шарт бажарилиши керак: аъзо давлатда коронавирус тарқалиш суръати сезиларли даражада озайган бўлиши ҳамда мамлакат шифохоналарида беморлар учун етарлича ўринлари бўлиши керак.
Австрия, Испания каби айрим аъзо давлатлар аллақачон карантин чораларни аста-секинлик билан бекор қила бошлади.
Франция президенти Эммануэль Макрон мамлакатда карантин чоралари 11 майдан бошлаб босқичма-босқич бекор қилинишини маълум қилди.
Германия канцлери Ангела Меркел эса 15 апрель куни мамлакатдаги 16 федерал штат етакчилари билан учрашиб, мамлакатдаги чекловларни бекор қилиш масаласини муҳокама қилади.