Қирғизистонлик депутатлар Иккинчи жаҳон урушида қозонилган ғалабанинг 75 йиллиги ва Апрель инқилобининг 10 йиллиги муносабати билан амнистия тўғрисидаги қонун лойиҳасини кўриб чиқиш учун парламентга тақдим қилдилар.
Қонун лойиҳасида ёши 60 дан ошган эркаклар ва ёши 55 дан ошган аёллар, имконияти чекланган шахслар, I ва II гуруҳ ногиронлари, оилада ягона боқувчи бўлган шахслар, икки нафар вояга етмаган фарзанди бўлганлар ёки имконияти чекланган фарзанди бўлганлар ҳамда илк бор оғир жиноят содир этганларнинг жиноий жавобгарликдан озод қилиниши кўзда тутилган.
Амнистия одам ўлдирган, оғир жароҳат етказган, бедаво касалликни юқтирган, эркинлик ва жинсий дахлсизликка қарши жиноят содир қилган, гиёҳванд моддалар тарқатиш билан шуғулланган ва мансаб билан боғлиқ жиноятларни содир этганларга нисбатан қўлланилмайди. Лойиҳада айрим маҳкумларнинг жазо муддати қисқартирилиши ҳам таклиф қилинган.
Депутат Мирлан Бакировга кўра, Қирғизистон қамоқхоналарида шу кунда 9500 дан зиёд маҳкум бор, амнистия қабул қилингудек бўлса, улардан 1202 нафари озод қилинади.
Парламент мазкур қонун лойиҳасини биринчи ўқишда қабул қилди.