Шу йилнинг 12 апрель куни Интернетга Қозоғистоннинг собиқ президенти Нурсултон Назарбоевни кескин танқид қилиб, видеомурожаат жойлаган ва эртаси куни миллий хавфсизлик қўмитасининг маҳаллий ходимлари томонидан ушланган қарағандалик Арман Хасенов икки ойга ҳибс этилди.
Айни пайтда у Миллий хавфсизлик қўмитаси ҳибсхонасида тутиб турилибди, тўнғич президент шаъни ва қадр-қимматини таҳқирлагани учун унга қарши очилган жиноят иши доирасида экспертизалар тайин қилинган.
Хасеновнинг икки ойга ҳибсга олинганини Озодликнинг қозоқ хизматига Қарағанда вилоят суди матбуот хизмати маълум қилган.
Гумонланувчининг олдига адвокат киритилган-киритилмаганига аниқлик киритишнинг имкони бўлмаган.
Аввалроқ Арман Хасенов ўз видеомурожаатида одамларни конституциявий тўнтариш ёки митингга чақирмаётганини урғулаб, ўз сўзи учун жавоб беришга тайёр эканини билдирган.
Қозоғистонда Назарбоевнинг шаънини таҳқирлаш жиноят бўлиб ҳисобланади. Мамлакат Жиноят кодексининг 373-моддасида кўзда тутилганидек, бу жиноятни содир қилган одам жарима тўлаши ёки 3 йилгача қамалиши мумкин. Ҳуқуқ фаоллари Нурсултон Назарбоевга “миллат лидери” мақомининг берилиши ва Жиноят кодексининг мазкур моддасини собиқ президент “шахсига сиғиниш”нинг бир қисми эканини айтиб келадилар.