Қирғизистон пойтахти Бишкекка 24 апрель куни Туркиядан ичида 351 нафар қирғизистонлик бўлган учоқ учиб келди. Бу ҳақда Қирғизистон Ташқи ишлар вазирлиги матбуот хизмати маълум қилади.
Республика тезкор штаби маълумотига кўра, қирғизистонлик икки давлат ўртасида авиақатновлар тўхтатилганидан бери мана шу чартер рейсини кутишган.
Хориждан келган қирғизистонликларнинг ҳаммаси обсервацияга жойлаштирилиши кутилмоқда. 17 апрель куни ҳам Истанбулдан чартер рейси билан Қирғизистонга 211 киши келган эди. Улардан бирида COVID-19 вируси аниқланган ва муолажа этилмоқда.
Ҳукумат маълумотига кўра, жаҳон бўйлаб коронавирус инфекцияси тарқала бошлагач, дунёнинг турли мамлакатларидан Қирғизистонга 4 мингдан зиёд ватандош қайтиш истагини билдирган.
Аввалроқ парламент депутатлари ҳукуматга хорижий мамлакатлардаги қирғизистонликларни ватанга қайтариш учун транспорт йўлаги ва чартер рейслар ташкил қилиш бўйича тезкор чоралар кўришни топширган. Шундан сўнг Истанбулдан чартер рейси ташкил қилиниб, 211 киши Қирғизистонга олиб келинган.
Айни пайтда Қирғизистонда коронавирус инфекциясига чалиниш билан боғлиқ 656 та ҳолат қайд этилган. 322 киши соғайиб кетган, 8 бемор ўлган.