Асли ўзбекистонлик миллиардер Алишер Усмоновга қарашли “Металлоинвест” тоғ-кон холдинги бош директори Андрей Варичев 27 апрель куни 52 ёшида вафот этди. Forbes нашри манбаси топ-менежер ўлимига икки томонлама пневмония сабаб бўлганини маълум қилган.
Манбага кўра, Варичев Москвадаги хусусий клиникалардан бирида жон берган. Ҳаётининг сўнгги кунларида у ўпка сунъий вентиляцияси аппаратига улаб қўйилган. Айни пайтда аввал топширилган икки таҳлил унинг COVID-19 вирусига чалинмаганини кўрсатгани айтилмоқда.
“Металлоинвест” ширкати бош директор Андрей Варичевнинг вафот этганини тасдиқлаган. Ширкат сайтида ёйинланган маълумотда Алишер Усмонов ҳам Варичев ўлими муносабати билан ўз таъзиясини изҳор қилган.