Шимолий Корея олий раҳбари Ким Чен Ун Россиянинг “Улуғ Ватан урушидаги Ғалабанинг 75 йиллиги” медали билан тақдирланди. Бу ҳақда Россиянинг Пхеняндаги элчихонаси маълум қилади.
Қайд этилишича, Ким Чен Ун медални олиш учун ўзи келмаган, мукофотни у учун мамлакат ташқи ишлар вазири Ли Сон Гвон олган.
КХДР армияси, партияси ва халқи раҳбарига мазкур мукофот “республикада ҳалок бўлган ва дафн этилган совет фуқароларининг хотирасини абадийлаштиришга қўшган улкан шахсий ҳиссаси” учун ҳамда “КХДРда совет аскарлари ёдгорликлари ва қабрларини сақлаб қолиш юзасидан ғамхўрлиги” учун берилган.
Медаль тўғрисидаги низомда мукофотлаш учун бунақа асос кўзда тутилмаган. Ҳужжатга мувофиқ, чел элликлар уни Иккинчи жаҳон уруши даврида Қизил армия ёки флот таркибида ёхуд партизан отрядлари таркибида жанг қилган тақдирдагина олишлари мумкин. Партизан Ким Чен Уннинг бобоси — КХДРнинг абадий президенти Ким Ир Сен бўлган.
Ким Чен Ун Иккинчи жаҳон уруши тугашининг 75 йиллигига бағишланиб май ойида Москвада ўтказилиши керак бўлган юбилей парадига таклиф қилинганди. Унинг мазкур тадбирга қатнашишга розилик берган-бермагани маълум эмас, бироқ параднинг ўзи кейинроқ номаълум муддатга қолдирилган эди.
Аввалроқ КХДР лидери Ким Чен Уннинг омма кўзидан ғойиб бўлгани турли миш-мишлар юзага келишига сабаб бўлганди. Айрим нашрлар ҳатто унинг ўлгани ҳақида ҳам хабар тарқатишга улгурган.